Luk 12 | BEF | STEP | Babu boana'i li nupa hite yege yege'magi ikini ikini hite ai gufalo ai gufalo hite mone'mofihi gigusalo i sala kose suhi hite nehago ana kana'alo Yesu pana'alobo'a yata'a luto lu epi'ehina: Lenali Felosi bona'magi faga faga lilana'mu hapa'ani kaba hu bati hite minalo.

Luke 12

Faga faga husemofihi kaba huse'i

Mt 10:26-27

1 Babu boana'i li nupa hite yege yege'magi ikini ikini hite ai gufalo ai gufalo hite mone'mofihi gigusalo i sala kose suhi hite nehago ana kana'alo Yesu pana'alobo'a yata'a luto lu epi'ehina: Lenali Felosi bona'magi faga faga lilana'mu hapa'ani kaba hu bati hite minalo. 2 Asaga'na fenene huto ninana alihi hepa'i kugumato huto nohinogo to asaga'na ifi toto ninana alihi bona'magi bu galana'mu yabe. 3 Ana huto asaga kaga folugu'i metepu inagu lilata nehana bona'magi yegelo kehelilabe. To asaga kaga lenali sumi sumi hite nonugu fala kite nelana enali hepa'i kugumato ti saga hite ho ti'ehite kehe ite lu hokolo hite lilana'mu yabe, luto Yesu lu'ehina yabe.

Bouba moneko bo koli huse'i yabe

Mt 10:28-31

4 Nalalu'nigita, nani lu nolepube. Lenali bona'magi mone bo gufa'a halana'mu lenali koli mehilo to enali aku'i aliha'a fato suhi mone'a hiti mehilana'mu yabe. 5 Lenali koli hilana bona'i nani lenelepilube, luto Yesu lu'ehina. Bona'i enohogo enohogo nohina bo Hu'mau, lenali ai'i koli hi etalo to ya'ma amuya'a hiti bo nohuto bona'i logo kapogu enele'mo he'mi epololenogo limilana'mu yabe, luto Yesu lu'ehina yabe. Nani lusiga luto lu nolepube, lenali ya'mana bo kaba hu bati hilana'mu nolube.

6 Nayahi mone kegi'a su hago namamo loe toealoti'i mina filata nehanamoba keheli'ahafihe? lu'ehina. Ya hu'ehina Hu'mau mone lagaso nama ekesu halina'a huto meni'ibe, luto Yesu lu'ehina yabe. 7 To latahatinigu nina okaya Hu'mau leka so'ehina'mu yabe. Ya hu'ehinagi lenali lenelesa linogo koli mehilo. Lenaliya Hu'mamofihi bulo asaga lagaso meso namamagihi mina'ani enebe ligite nehabe, luto Yesu lu epi'ehina yabe.

Yesuhi gi'a lu yege hosemofihi hapa'a

Mt 10:32-33; 12:32; 10:19-20

8 To nani lu nolepube. Bo moneuba nani nigi'ni boana enubulo lu yege homofa'na hilina ana huto Kokulumaguti limi'ehina Bouba ai ana bomofihi gi'a lu yege homofa'na Hu'mamofihi agelo'amagihi enubulo hilina'mu yabe. 9 Ya hu'ehina to bo moneuba nani'i megesa hu nimito boana'magi enubugu buya hinogo minalina nani ana huto megesa hu emito Hu'mamofihi agelo'amagi enubulo minaluna'mu yabe luto Yesu lu'ehina yabe.

10 Bo moneuba Kokulumaguti limi'ehina Bomu'i ka foipa'a lu etalina Hu'mau ai foipana'a li he'mi etalina'mu yabe. To bo moneuba Sikalafu'mofihi ka foipa'a lu etalina Hu'mau foipana'a li mehe'mi etalina'mu yabe, luto Yesu lu epi'ehina yabe. 11 To enali ka foya lilune'mu nehite mono nonugu lenele'mete bite gamani bona'i to kibina bona'i nehilana enubulo lenele'mete nebinogomo lenali koli hilete lenegekesa yigi yigi hite ma lite mekehelilo: Lali hena huto kaga'anilo lilune? Lali hena kaga lu epilune? 12 Ya'ma lite lenekesa yigi babu nelilana kana'alo kaga'anilo lilana kaga Sikalafu'uba lenelepilina'mu yabe, luto Yesu lu'ehina yabe.

Yogo fe'noho bomofihi bame ka'a

13 Babu boana'magihi folagaha'aniguti bo moneuba Yesuhi ma luto kaga lu emi'ehina: Tisa, kai nogo'nifihi lu emitogo yogo fe'nohi afoti'afihi omiha'a lilu'ina'a guna ito luga'a nani'i nimilibe. 14 Ya ligo Yesu ka'alo ma luto lu emi'ehina: Ma bose. Hena hibe nolane? Kuyu'afu nani'iyasiba nele'mo ho ti'ehigo kagatiti loko hoto yaga fe'nohatiti guna ise bo nohube? 15 Ya luto luloto asaga boanatoga ma luto lu epi'ehina: Lenali kaba hu bati hilo. Lenali kaba hu bati hite nehite mole'ale'namu'i muyana'nise lite melilo. Yaga fe'noha'a babu lito minana bouba ya fe'nohi malana'a huto komopa'a bebe mesalata nohibe luto Yesu lu'ehina yabe.

16 Sipi bo moneuba me'aluguti nose'na babu luto hu molo'ehina. 17 To ya higo ana sipi bouba komopa'agu ma luto ekesa yigi'ehibe: Hena'ni hilube? Noha'ni nose'na li nupa huto molose noha'nimo kikipa habe. Hena'ni hilube? 18 To ekesa yigito ma lu'ehibe: Ma hilube. Ana nopo tele bito'ni yuhufa nohi sipina giloto'ni nose'na'ni hiti fe'noha'ni hiti yagu'i li malalube. 19 To yalo'i nipa'nigu ma luto lilube: Fokehi libo nipa'niyao. Nose'na hiti fe'nohi hiti babu luto ni'inagi yatai asaga foya kanagu fuli minalube. Fuli minoto'ni to nose'na noba nobo huto'ni to yokolo'na huba huba huto minalube. Fokehi libo nipa'niyao. 20 To ana bouba ya ligo, Hu'mau: Kai negi bo nohane, luto, kai yatai folugu'i fililata'mu yabe. Filito to felekamo kugufaka he'mito bilina'mu yabe. To ya huto nofilitogomo, ya'mana li nupa hu molo'ahatanamo kuyu kuyu hite lilabe? Hu'mau ya luto lu emi'ehina. 21 To Yesu ma luto lu epi'ehina: Nani ya'ma lu nolepube. Ana huto asaga bona'mo Hu'mamofitoga hosapa ite nehana to enali'ani kumu salahi fiba fiba nehana bona'magi enali asaga'i ana bomofihi supo hite neminabe. To Hu'mau enali hapa'ani sibina ni'igo bu goto ana huto ka epekilina'mu yabe.

Hu'mamofihi komopati emisemofihi hapa'a

Mt 6:25-34

22 To Yesu pana'alobo'a lu epiloto ma luto lu'ehina: Nani lu nolepube. Lenali minosenatini'mu lenekesa yigi babu melite to lenali ma melilo: Lali henana nalune? To lenali lenugufatini'mu lenekesa yigi babu lilete ma lite melilo: Lali henanatu'i lugufatilo ifi talune? 23 To hetofana huto minose'nauba nose'namofihi hoto ni'ibe to kugufauba guketemofihi hoto ma'naka ni'ibe. 24 Namamagi lenubu galo. Enali nose'na hekelete nose'na li nupa hite to nose'na noha'anifi to ana'ina'ani malalana noha'ani meni'ibe. Ya hu'ehinagi Hu'mau nose'na epilata nohibe. To lenali Hu'mamofihi bulo boana'magita namaya enehete enebe ligite nehabe. 25 Ma nehana folagahatiniguti bo moneuba ekesa keheliba keheliba huto kufu kana'a mone hiti lugufaba minomo buto minalina ni'ifihe? 26 To ana lagaso'na mone ya hite lolo menehanaloti hena hibe lite lenali fato'namu lenekesa yigi babu lilata nehabe, luto Yesu lu'ehina yabe. 27 Lopi kifi'na talo'a tilata nehanamo hena hena hite tilata nehafi lenali bu galo. Enali lili'na lila to enali gukete'ani lolo hila menehabe. Ya hu'ehinagi nani lu nolepuna. Koyapa bo Solomoniu sipi fe'noho bo minana'a huto gukete mana'a li mehekolose kifi'na talo'a hetofa'amagi hana'a huto mino'ehina yabe. 28 Hu'mau ai'a kifi'namagihi gukete hu epololata nohibe. Kifi'na malo yatai nehana yago bifa hilana'mu yabe to logouba enoloboto su halina'mu yabe. Fa'mene kifi'namolo Hu'mau gukete nohu epalanamo ninago ana huto Hu'mau gukete hu ketalina'mu yabe. Ya hu'ehina Hu'mamofihi keheli bati hite keheli emilenogo Hu'mau ai lenele'mo bati hu lepalalina'mu yabe. Lenalise, ka keheli ule'ale huse'natini nesi'asi minana boana'i yabe, luto Yesu lu'ehina yabe. 29 Ya hu'ehinagi lenali lenekesa yigi babu lite hena nose'nati nalune lila to hena nagamiti nalune lila ya hite melilo. Lenali lenegekesa yigiba yigiba mehilo. 30 Enali ma melugu fegutoga bona'magi asaga'namu enegekesa yigi babu lilata nehabe. Ya hu'ehina Afotinifu anana anana lilana ya'mana ya'mana lilabe luto akeheli'ehibe. 31 Ya'iyana'mu lenekesa meyigise Hu'mamofihi kapo'a lenugufa komopa'alo li kohe tete yata'a melelenogo ai Hu'mau asaga'namu lepesilina'a hiti lepilina'mu yabe, luto Yesu lu epi'ehina yabe.

Hetofana fato fato'i kokulumalugu li nupa husemofihi hapa'a

Mt 6:19-21

32 Lenali lagaso naga'nise, koli mehilo. Afotinifu ai'a kapo'a lepilunagihe luto kaga lu hetofa hu'ehina yabe. 33 Lenali asaga fe'nohatini bona'i luga'amagihi epinogo efahi ananalo lepilenogo aku'i ana efahi musufalo bona'i epilo. To lenali kosaba gu'i efahi li malalatamo analo'i sibina mehilina'mu yabe. To lenali ifo muya yogo fe'nohatini kokulumalo meminigilina'mu yabe. To kokulumalugu guminalo bona'i menehabe to efahatini sifolohi megilina'mu yabe. 34 Lenali hetofa mina'a lenalitini ni'ilinalo ana hepato komopatini minalibe.

Lili'nalo pana'magi li loloba hite minalanamofihi ka'a

35 Lenali katatini li hupa mone hite hepite to gilimitini ilete to logo kokululu lite lele hite minalo. 36 To lenali bona'i luga'amagi kaba bo'ani he'mi epololoto ana gukete nehanaga bu'ehigo lele hite nehago kaba bo'aniuba oto gelo bi epoloto enofokehi nohana suhi lite lenali minalo. Ya hite, geba kaba bo'ani hite nehago kaba bo'aniuba oto kasito noigomo mele'isi kafe nekisi etabe. 37 To kaba bo'aniuba oto koko panana'a bu enagalina enubu'i mekese geba hite nehinogomo yalo ana koko pana'alobo enofokehi halabe. Nani lu nolepube. Sipi bouba ai'a kata'a li hupa mone huto hepiloto'a to gilimi'a iloto hitalo enele'mo moloto ai'a nose'na gabu ito epilina'mu yabe. 38 To ai folugu'ifi folugu'i kokole nogo memolo'ehinogofi otomo koko panana'a bu enagalina enubu'i meke'ehitemo enali ya'mana koko panana'amu'i fokehi lilibe, luto Yesu lu'ehina yabe. 39 To ka mone hiti lipoti nolepugo ya'ma kehelilo. To nohi afo'afu guminalo bouba oto noha'aguti gumina lilina kana'a keheli'ohutomo ai he'mi'ehigo noha'aguti tito gumina lilata menohibe. To hena'mugope ai kaba gimi gito minolata nohigo yabe. 40 Lenali hiti ana hite lele hite minalo. Kokulumaguti limi'ehina Bo ana huto lenali lenekesa meyigise fa'mene nehinogo ya'ma kanagu alina'mu yabe.

Hetofa koko pana'i hiti foipa koko pana'i hiti bame ka'a

Mt 24:45-51

41 Pitau ma luto Yesuhi lu emi'ehina: Sipi Bo ya'mana kaga lali'isigo lu nolimipi to ma asaga bona'i hiti lu limi baga noine? 42 To Yesu lu'ehina: Kaba bo mone ekesagu fe lina bo nohuto ai lili'na'a kaba hu bati huto minoto to sipi bo'auba kaba bo le'mo ho tiloto lili'nalo bo'a nose'na li keheli epilifi? 43 Alihi sipi bo'a oloto koko pana'a bu galina koyapa'i lu eto'ehina'a huto nohutomo ya'mana koko pana'a gelo bilibe, luto Yesu lu'ehina. 44 Nani ma'naka luto lu nolepube. Sipi bouba asagana'alo ana bo kaba bo le'mo ho tilina'mu yabe. 45 To ya hu'ehina ya'mana koko pana'auba ma luto ekesa kehelilibe: Kaba bo'ni minoba minoba nohuto mele'isi menoabe, ya luloto ai luga'a koko pana'a hiti luba hilete boana'i asaga'i amuya nagami'i nelete negi nagi nete minalabe. 46 Ya nehinogo sipi bo'a oto bu galina lele mehuse nohinogo italuga logo binogo kai bati mehata koko pana'i yabe luto keye luto emitatu'i ibe laga hube huto nesi nesi huto kegeiyo hina'mu luto he'milina'mu yabe.

47 Sipi bo'amofihi hapa'a akeheli'ehilina bo ai aku'i ana'ina'a le'mo lele mehuse kegeiyo huto sipi bo'amofihi ka'a keheli meemise nohilina sipi bo'auba ana koko pana'a osahi sipi halina'mu yabe. 48 To lili'nalo bo moneuba sipi bo'amofihi ka'a keheli bati menohina mone foipa hu'ehigo ai'i osahi nesi'asi fulu huto halina'mu yabe. To Hu'mau bona'i mono'mofihi nasana epi'ehinana enali aku'i babu lite analo molo emite epilabe. To boana'i enali babu ana'ina bo mone'mofihi yanugu melelata nehana alihi enali ananalo aku'i babu lito molo emito ana bouba epilata nohibe.

Yesu kumu lite bona'i loko hi'ahana

Mt 10:34-36

49 Nani ma me'i fi'mo suhi huto galube, luto limi'ohuna yabe. To ya'mana fi'mo mele'isi ma melugu hololu luto lalifi luto nemehi nomolobe, luto Yesu lu'ehina yabe. 50 Nani mone fi taga huse'na nanitoga huto hilibe, luto nekesa noyugube, lu'ehina. Ya nohuna yatai ana fi taga huse'na su mehenogo sipi keta nonebesibe, luto Yesu lu'ehina yabe. 51 Lenali lenekesa neyigina nani ma melugu fuluna lito noabe lite nelafihe? O'e, fuluna meni'ibe. Nani boana'i enele'mo luga luga hilube'mu yabe. 52 Yatai hiti aliha'a hiti lalamehi nayahi mone kegi'a su hago moneko nonugu neminabe. Ya nehana loko hite loe naga'i hilete loegi monegimagi loelo fateha'ani etele'mo lolo nehinogo to loemale'i loegi monegimagi enele'mo fatehi hilana yabe. 53 Ya hite loko hilete afo'anifu panana'a enele'mo fatehi lolo nohinogo to pana'amagi afo'anifihi le'mo fatehi lolo hilabe. To ito'anifu pa'a enele'mo fateha'a lolo nohinogo pa'amagi ito'anifihi le'mo fatehi hilana'mu yabe. To a'mofihi lito'afu le'mo fatehi nohinogo ana a'uba lito'afi le'mo fatehi hilina'mu yabe.

Ana'ina huto hilinamofihi kana'a kehelise'i

Mt 16:2-3

54 Yesu boana'i hiti ma luto lu epi'ehina: Lenali yege limi nofalanagati sopohi notinogo bu geletemo analo mele'isi ma lite lilata nehabe: Ko'i ilube'mu nohibe lite nelago analo ko'i ilata nohibe. 55 To yofo kegi'ati habafahi noagomo lenali yege lalube'mu nohibe lite nelago analo mukoho luto yege lolata nohibe. 56 Lenali faga fagalo bona'i. Lenali me'i hiti kokuluma'i hiti bu go bati hilete hena huse'na ni'ifi lite bu galo. Ya hu'ehina lenali hena hibe lite yatai kanamofihi hapa'a ya'ma nani kumu'i bu go bati menehabe? Yesu ya luto lu'ehina.

Ka foyaga kele'mo malalube'mu hilina bo hiti kaga le'mo bati hiliyo

Mt 5:25-26

57 To hena hibe lite lenalitini lenekesa yigi bati hite to bati hina sukumu loko hite latahatinigu li fu lilata menehabe? 58 To bo moneuba ka foyagu kele'mo malalube'mu kele'moto nobinogomo kapoga nebite ana bo kaga le'mo bati huto mone'na lu emibo. Bonaka ka foyagu kefefe huto buto koti kaba bomofihi yanugu melenogo koti kaba bomagi kele'mete bite gimi bomagihi epinogo enali nagalugu lenele'mo mele lalabe, luto Yesu lu'ehina. 59 Nani yatai lenali'i lipoti lu nolepube. Lenali nagalugu minalana hepatogati mele'isi su mehalana'mu yabe. Yata'a lenalitoga sipi'afi lagaso'afi efa lenaya he'ahanana epi pa se su heletogo yabe, luto Yesu ya luto lu epi'ehina yabe.